السلام السلام لروحها
في زمن اليتم ويتامة الأحرار..
ومن مات في الثورة فسيحيا وإن مات
منتهى سلطان الاطرش ابنة الثائر القائد سلطان وروح أمة حرة وعالية فيها
سلطان باشا
الصكر
شعر : حسان عزت
ياصكر يللي بالمدى
محوّم على ريشة خيال
صوب الشمس بتجيب هالات المجد كل المجد
وبتحطّا على راس الوطن بعقال
يامشعّل الثورة بغضب ياحرّ
وهوج الحر
ومهدم على راس العدو بجبال يا مطلّع بلدنا أرضنا سوريتنا للكرامة والنصر
لفوق فوق وعالية
وع الظلم ما بتصبر ولا ع الضيم بمحطة وسؤال
وبتشعل ها الرحب نخوة وإباء وموج
وبتحرق جيوش العدو
ومن خلفك ألف خيّال
يا بو حطة البيضا متل الشمس
يا معلم الأبطال مافي هون
وبترجع ع الأرض رجعة فرس نشّام
لتشم ترابها الأم وتضمها
وتقلا يا أمي وتاج راسي الدوم والمنصان
انت جنتي وهلي وجيران
ما ببدلك بكنوز الارض كلّها ولا بمال المحال
يا عايف قصور الملوك ومسلطن
كرم
وحاطط خوف الله بعيونك امان ومكحّلة بروح الأم
وكرامة وطنا بالسما وع الراس
والسلسال
منمجدك
يابطل
يارمز بالورد والورد
ومنقبّل ثرا ترابَك سلام
وبنقولك شمس حرية وشعب
سلامك يابطل
وكيف الحال
وهاي المنتهى العالية نجمتك بالبال والموّال
